ایزلرین

             آیریلیق یول لارینی اؤپنده

  باخیش لاریندان بیر چرشنبه لیک اوغورلاییب

                          گؤزلریمین بوخجاسینا باغلادیم

آجی گولوش لرینله

                            پوزانمایاسان بایرام پاییمی...

                    آق بایراقی قالدیرسان 

                                                    قیرمیزی اولوم پای آلیرسان

*********************

قیرمیزی اولوم پاییمیز اولسادا

                                  آق بایراقی قالدیراق

                                                                و . . . یاشیل یاشایاق     

اؤزومو، سنی، شهری

اونوتماق ایسته ییرم من

سن سیز آچیلان سحری

اونوتماق ایسته ییرم من

یاشادیغیمیز آنلاری

سئودالی خیاوانلاری

یالان لای، تالان لاری

اونوتماق ایسته ییرم من

قوشا گزدیگیمیز داغی

چمنی، گولو، بولاغی

اوگونو، دونو، بایاغی

اونوتماق ایسته ییرم من

اوره ییمده قالان ایزی

اوغروندا چؤکولن دیزی

دوغرو یالان سئوگیمیزی

اونوتماق ایسته ییرم من

آلمان اولسا آلتی دنه

اوچونو دوستون گؤتورسه

نئچه آلما قالار سنه؟!"

آپاغ دئدی: "منه وئرمه

بئله حساب، بئله سانی...

من دوستومو چوخ سئویرم

قوی گؤتورسون هامیسینی."

ساچلارين گونشين سولغون چاغينا اوخشاسا دا 

  هله قوجالماييبسان 

  بارماقلاريندا اوزوک 

  ياناقلاريندا اوزوملوک 

  دوداقلارينداکي بویالی تبسسومله 

  گنج­ليیيني قورويورسان 

یام یاشیل مئشه لر آلمالی باغلار

دورنا گؤز بولاقلار زیروه لی داغلار

سه ییرن ککلیک لر گؤزل سونالار

گؤره سن واریمیش یا بیر یوخویموش؟!

سس سیز دره لرده بیتن بنؤوشه

قونچالار آچیلا اوزلو گولوشه

اوشاقلار اوینایان دوورارسیز مئشه

گؤره سن واریمیش یا بیر یوخویموش؟!

بیری بیرین سئومک پولسوز پاراسیز

شاققا چالیب گولمک دردسیز یاراسیز

آرخایین یاشاماق سؤزسوز قاراسیز

گؤره سن واریمیش یا بیر یوخویموش؟!

گئجه لر یوخودا آغ آتا مینمک

قاپی دؤیولنده اورک سئوینمک

سازیلا سؤزیله ائلی گولدورمک

گؤره سن واریمیش یا بیر یوخویموش؟!

تارلالاردا گزن تئللی توراغای

هریانا باخاردین بولاغیدی چای

حسرتده یاشایان کؤلگه سیز توغای

گؤره سن واریمیش یا بیر یوخویموش؟!

سن

           هر زامان

                       "سودان گلن كوزه­لى قيز"سان.

        هر زامان گونش باجيسى

                                     - گئجه­ده آچيلان آى باجاسى -

سن

     هر فصیل يازسان

     باهارين ايكينجى آييسان

                                       سن.

آشیق ائل لر آیریسی

شانا تئل لر آیریسی

بیر گونونه دََؤزمزدیم

اولدوم ایل لر آیریسی

بیـری سئودامی اونوتـدو

نئجه قییدی؟! نئجه قییدی؟!

بیرگون آتدی بیرگون توتدو

نئجه قییدی؟! نئجه قییدی؟!

بیری منــدن منی آلدی

اؤزو گئتدی سؤزو قالدی

آدیمی دیللــره سالــدی

نئجه قییدی؟! نئجه قییدی؟!

یانــدیم منــه اینانمادی

بیر یول دردیمه یانمادی

سؤزو اوستــه دایانمادی

نئجه قییدی؟! نئجه قییدی؟!

مزه سيز درد ايچن لرين

يارالاري

             درين- درين

 *       *         *

آد گونونه گليرديم من

...

مزار باشيما

                  گلدين

                             سن!

*      *         *

يالاندان يارانديم...

    گئرچكدن

                 اؤلدوم.

قايناق: ساده سن وگؤزل بير سلام كيمي. حسين رزمي . پينار يايين ائوي 1387

گله جه یم، گؤزله دئدین منه

من گؤزله مه دیم

سن ده گلمه دین

اؤلوم کیمی بیر شئی دی

آمما کیمسه اؤلمه دی

لؤطفن  منی پیچاق لایین!!!!

های دوشسون   شهره   

بیر شاعیر اؤلدو!!

یئنه او باغ اولایدی، یئنه یغیشاراق سیز،

اوباغا كؤچیدینیز ،

بیز ده مرادیمیزجا فلكدن كام آلایدیق ،

سیزه قونشو اولایدیق ،

یئنه او باغ اولایدی،سنی تئز – تئز گؤرئیدیم ،

قلمه سؤز وئرئیدیم ،

هر گون بیر یئنی  نغمه ، هر گون بیر یئنی ایلهام ،

یازایدیم سحر ، آ خشام ،

آرزویا باخ سئوگیلیم ، تئللریندن اینجه می ؟

سؤیله اوریینجه می ؟

بیر گئجه

یارالارین یاساسی پوزولارکن

یاسلی سوکوت – یاشلی سوکوت

باغیرتییا دؤنوشه­جک...

بیز،

بوتون توتساق اولدوزلارلا

اوزله­شه­جه­ییک

تیلیسم قارانلیقلا...

و گوللـه­لرین توشو ایله

کئچه­جه­ییک، شهیدلیک کئچیدیندن...

صاباح

اکیلن دار آغاجلاریندان

گونش دره­جک اوشاقلار...

من ائللرين ، بوغازدا بوغولموش سؤالييام

من اؤلکه‏مين شفقده باخان آي هيلالييام

سن بير قارانليغا سيخيليب ، دويغو دويمايان

من ، دان زاماني ، آيدا قوپان گون خيالييام

بير کاسه آشدان اؤترو ، دانيبسان آنا ديلين

مندن‏ده ايسته‏مه ، کي گليب کاسه يالييام

سن قوردا قويروغون سيخان ايت، من ده بير قوزو

يئتمز سَسيم چوبانا ، سورومدن آرالييام

مندن اگر اؤز ائللريمه سَس يئتيشمه‏يير

اؤز بختيمين ، اويوندا جيريلميش قاوالييام

چوخ‏دا گؤوَنمه شهريده، قصرين هاوالى دير

من سَس وئرَرسَم ائللره ، سندن هاوالييام

نَه اوز وئريب زمانه ده، کي کيمسه سؤيله‏مير

هاردا ائويم ، نَه يئرده ائليم ، يا هارالييام

آديم “باهارلي”، يوردوم آدين ايسته‏سَن ، “باهار”

“تؤرک ” اوْغلويام، “اوغوز”لارين ايتگين ماحالييام

چاغيرير ايندي بوتون ميلتي ايمدادا وطن،

دييشيلمز اي اوغول، جنّته دونيادا وطن.

 بيزه مئيدان اوخويان بيلمه­ليدير بيردفعه­ليک،

نه ساتيلماز، نه وئريلمز بينه­دن يادا، وطن.

 سينه آلتيندا گرک قلب کيمي هر آن دؤيونه،

يانا اولدوز کيمي هر سؤزده، هر ايمضادا وطن.

 وطن عشقيندن اوجالسين بوتون ايستکلريميز،

ياشاسين آرزودا، مقصدده، تمننادا وطن.

 اولولار اويمادي وارـ دؤولته، يالنيز دئديلر:

ان بؤيوک بخشيشيميز بيزدن هر اؤولادا: وطن!

 وطن عشقيندن آلار بختييار اؤز قودرتيني

دؤيونر قلبي کيمي هر يئني ميصراعدا وطن.

                                                          1994

سیلسم گؤزلرینی شئعیرلریمدن؛

 بورنونو قیریشدیریب،

 دوداقلارینی بوزه‌رسن شئعیر دفتریمده!

 سیلسم بورنونو، دوداقلارینی شئعیرلریمدن؛

 ساچلارینین دنیز قارانلیغیندا

                          قارالار دفتریم!

 سیلسم ساچلارینی شئعیرلریمدن؛

 آغ کاغیذ قالار.

 و من!

 نه شاعیر نه‌ده رسسام،

 الی قانینلا بویانمیش بیر قاتیل کیمی

 یاخالانارام ساچلاری‌نین

            سیلینمز عطیرینده

 و دوستاقلانارام شئعیر دفتریمین سطیرلرینده!

                بلکی بیر پوک سیگارا

                                   بلکی ده دوداقلارینی اؤزله ییر

                                                                      دلی کؤنلوم

یوخسا...

             آجیماسیز بیر اؤلوم له

                                           قوجاقلاشماقدایام...

پارچالاندیق سینمادیق

 داش آتانلاربیلمه دیلر

 پارچالانمیش آینادا

 بیرآیدان مین آی چیخار

 بیرگونشدن مین گونش

 بیراولدوزدان مین اولدوز

 پارچالاندیق آیناکیمی

 چوخالاریق،چوخالداریق ایشیغی

 گوندوز گونه عادتی وار،گجه اولدوزلارا ، آیا

 بوداقلارباهارا

 میوه لر یایا

 گمی لردنیزه

 بالیقلار چایا

 پنجره لر آچیلماغا،بیرآز تازا هاوایا

 آچیق یئلکن عادتی واریئللره

 آراز دلی سئللره

 آینا گؤزه للیگه

 داراق تللره

 غریب آدام عادتی وار وطنه ،داغلارا ،چنه

 آیریلیق گونلری منه

 من سنه!

عزیـــــزیم آمان گونــــده

آه گونـــده آمان گونــــده

سن سیز بو یازیق کؤنلوم

نئیله سین یامان گونده؟!

گنجليک بويو اللريندن ياپيشديم

 گؤزلریمی گؤزلرینه دیکه رک

 دؤشومو دؤشونه داياييب،

 بورنومو بورنونون اوجونا سورتدوم اؤلومون.

 آخ! بو نه چئشيد سئويشمه!

 دولغون دوداقلاري نئجه ده دادلي يدي

               نامرد اؤلوم قيزينين!

               آغلاما!

عزیزیم آتانمادیم

آییلدیم یاتانمادیم

گئجه گوندوز یول گئتدیم

هئچ یئره چاتانمادیم...

گیلئی یئری یوخدور
اوچوروم اؤزومدن باشلاندی
باتینی، اؤزوم قان قوسدوم کاغیذا
آتام اکدییی رؤیا،
دئییلم یا!؟

گیلئی یئری یوخدور
آسفالت یوللارین سونو،
بیر فیشقا ایله دویومله نیر.
آلاولو شکیل لر بیتمه ده
باققاللار گوندوزو چئینه ییرلر!
قصابلار ساعاتلاری شاققالاییرلار!
چؤره کچی لر حیاتی کونده له ییرلر!

پارتیاچی لار، کاغیذلارلا ساواشمادا
قیزجیغازلار، تئلفونلارلا سئویشمه ده
گؤزلر اوزوم کیمی دَنلنمه ده!
سوروجولری اووشدوران یورغونلوق
سوزولور هامییا، هر شئیه.
اؤپوشلر
دنیزدن ایراق دوشن بالیغی یامسیلاماقدا
مکتب لرده، بئیین لر
گیردکان کیمی چالینیر!
خسته خانالاردا قادینلار دوغماییرلار
اریک کیمی چَردکله نیرلر!

گیلئی یئری یوخدور
بوراسی تبریز
سنینله یم هئی،
آزادلیغی سومسونمه خیاوانلاردا اینسان اوغلو!
آزادلیغی توفنگ ائدیب اکمه باخچالاردا
آزادلیغی اؤل بیر آخشام اوستو
اؤل!

گیلئی یئری یوخدور...

او قادین اوشاقلاری

آج قالماسین دئیه،

قوجاقلاردان چیخاردیر چؤره­یینی…!

او قادین قوجاقلاردان

چؤره­یینی چیخارتماسین دئیه،

هر گلیب گئده­نه

ال اوزادیر…!

او قادین هر گلیب گئده­نه

ال اوزاتماسین دئیه،

زیبیللرین ایچیندن

آختاریر یئمه­یینی…!

او قادین زیبیللرین ایچیندن

یئمه­یینی آختارماسین دئیه،

اؤزونو یاندیریر…!

اؤزونو آسیر…!

زهر ایچیر…!

او قادین اؤلور…!

اؤلورم، جان آختاریرام هارداسا

گول تک بسله مه گه قیزیل گولـله نی

اؤزل باغبان آختاریرام هارداسا

نیسگیل لر یوردوندا اومود بیتیرن

سئون لری بیربیرینه یئتیرن

باخیش لارا گونشی پای گتیرن

بیر دوزگون دان آختاریرام هارداسا

سحر سؤیله ییردی باغدا قرنفیل

چالیش بیلمه دیگین گئرچک لری بیل

یاخشی شاعیر اولماق چتین ده دئییل

یاخشی اینسان آختاریرم هارداسا

آختاریردیم

آدینیز

فیلتر اولموش

            سیته­لرده

دوشونجه­نیز آنجاق

فیلتر سیندیراندیر...

سن یاریمین قاصیدی ســـن ایلش سنه چای دئمــــیشم

خیالینــی گؤندریــــب دی بس کی من آخ وای دئمیشم

آخ گئجه لر یاتمامیشـــــــام من سنه لای ـ لای دئمیشم

سن یاتالی من گؤزومـــــه اولدوزلاری سای دئمیشـم

هرکس سنه اولدوز دئیــــه اؤزوم سنه آی دئــــــمیشم

سندن سونرا حیـــــــاته من شیرین دیسه زای دئمیشـم

هر گؤزلدن بیر گول آلیـــب سن گؤزله پای دئمیشــــــم

سنین گون تک باتمـــاغینی آی باتانا تــای دئمــــــیشم

ایندی یایــا قــیش دئییـــرم سابیق قیشـا یای دئمــیشم

گاه تویونو یــاده ســـالیب من دلی نـای ـ نـای دئمیشم

سونـرا یئنه یاســـه باتیب آغلاری های ـ های دئمـیشم

اتک دولــو دریــا کیمــی گؤز یاشیما ، چای دئمـــیشم

عؤمره سورن من قارا گون آخ دئمیشم ، وای دئمیشم .

باخيشيندا آي آشیق دومانلي داغلار هاواسي
اوره گينده بوتون عالمده اولان غم ياراسي
دامجي- دامجي توكورسن گوز ياشيني ساز اوسته
اوخويورسان((نبي)) ني، ((چنلي بئلي))، ((قيزقالاسي))

آتلاناركن قووسان الده تاتار
اوجادان سسلنيرسن
داغلاري، دونگه لري سير ائديرسن
چوللرين لاله لريندن دئيرسن
سازي ديللندير آشیق گلدي باهار